Hekurudha Tiranë-Rinas -Durrës do të hapet vitin e ardhshëm. Ajo do të ketë 10 stacione, ndërsa trenat do të lëvizin me shpejtësi 120 km në orë.

Hekurudha Tiranë-Rinas -Durrës po merr formë nga dita në ditë dhe deri ma tani janë ndërtuar rreth 80% e punimeve.

Zëvendëskryeministrja, Belinda Balluku ka parë nga afër kantierin, ku përvec trasesë dhe shinave, do të ndërtohen edhe stacione qëndrimi.

“Rreth 80% e proceseve janë të bëra. Nga ana tjetër, jemi edhe duke avancuar me komponentët e tjerë siç është pjesa e stacioneve. Është mbyllur gara ndërkombëtare për stacionet, kemi tashmë një fitues. Hekurudha Shqiptare është në momentin kur po lidhet kontrata, po negociohet lidhja e kontratës dhe më pas nis menjëherë nga puna për ndërtimin e këtyre 10 stacioneve të cilat janë parashikuar në projektin origjinal të gjithë hekurudhës”, tha Balluku.

Balluku foli edhe për projektet e tjera hekurudhore, të cilat do të transformojnë një sektor, i cili është lënë në harresë gjatë dekadave të fundit.

“Do të kemi një manual të qartë operimi për të gjithë hekurudhat e tjera për të cilat ne kemi aplikuar apo kemi fituar, siç është rasti i Vorë-Hani i Hotit që është projekti që do të fillojë menjëherë, domethënë tani duke pasur parasysh që i kemi mbyllur të gjitha proceset për atë hekurudhë dhe ndërkohë ne po presim miratimin për të gjitha pjesët e tjera që kemi aplikuar pranë ËBIF, siç është Durrës-Rrogozhina apo më pas Rrogozhinë-Pogradeci, pra Korridori i VIII, që për ne është një nga segmentet më të rëndësishme pasi lidhet dhe me portin e ri të Durrësit”, shtoi ajo.

Trenat që do të lëvizin në hekurudhën Tiranë-Durrës do të jenë elektrikë dhe do të lëvizin me shpejtësi 120 km në orë, duke nisur nga viti i ardhshëm.

LEXONI GJITHASHTU:

• Unaza e Madhe e Tiranës, Balluku: Loti i 6 gati për qarkullimin në fund të vitit
• Balluku inspekton punimet për ujësjellësin e Patosit: Reforma në UK po jep rezultate