Balluku inspekton punimet për ujësjellësin e Patosit: Reforma në UK po jep rezultate

Zëvendëskryeministrja dhe Ministrja e Infrastrukturës dhe Energjisë, Belinda Balluku, së bashku me drejtorin e AKUK, Klevis Jahaj, inspektuan këtë të premte punimet në ujësjellësin e ri të Patosit.

Sipas Jahaj ndërtimi i ujësjellësit të ri në Patos ka hyrë në fazën përfundimtare, duke garantuar furnizim të pandërprerë me ujë të pijshëm për qytetin dhe fshatrat përreth.

Jahaj theksoi se në lotin III po plotësohet skema e furnizimit për Patosin dhe njësitë administrative, ndërsa loti I dhe II kanë përfunduar me sukses.

Sipas tij, afro 40 mijë banorë do të përfitojnë nga ky projekt, i cili transformon situatën e furnizimit me ujë.

Zv. kryeministrja Balluku theksoi se reforma në sektorin e ujësjellës-kanalizimeve ka filluar të japë rezultate, me uljen e humbjeve nga 80% në 25%.

“Është shumë e rëndësishme që të vazhdojmë me procesin e reformës. Kjo ndërmarrje rajonale e Fierit apo qoftë dhe ajo e Lushnjës janë ndërmarrje shumë të rëndësishme. Kemi pasur edhe këtu përmirësime. Do ulen humbjet, nga 80 në 25%. Pra nuk është thjesht që do të furnizojmë 40 mijë abonentë dhe më shumë, por nga ana tjetër do të kemi dhe një ulje të rëndësishme të humbjeve në rrjet”, tha Balluku. Ministrja e Infrastrukturës dhe Energjisë shtoi më tej se krahas sigurimit të furnizimit me ujë e rëndësishme është edhe ulja e kostove për vetë kompaninë. “Duke zgjidhur problemin e ujit të pijshëm për 24 orë kemi disa detyra të tjera që na dalin: Nga ulja e kostove, kur vjen puna tek autoprodhimi i energjisë, efiçenca e energjisë, pompat e reja dhe deri tek pjesa e sigurisë, sepse të gjitha depozitat nuk mund të jenë më në kushtet që i kishim. Depozitat duhet të jenë të monitoruara me kamera, tw rrethuara, sepse janë zona të sigurisë së lartë dhe nuk mund të kenë akses qytetarët. Të gjitha këto janë pjesë e reformës dhe duhen ndjekur, sidomos në kantieret e reja që dorëzohen, ku i kemi mundësitë që të bëjmë siç duhet projektin nga fillimi dhe ndërkohë të mitigojmë të gjitha ato që janë ekzistuese”, u shpreh Balluku.

Ministrja theksoi rëndësinë e sigurisë dhe efikasitetit, duke përmendur nevojën për pajisjen e abonentëve me më shumë se 800 matësa.

LEXONI GJITHASHTU:

• Balluku inspekton punimet në Unazën e Madhe të Tiranës: Kur pritet të përfundojë
• Punimet në tunelin e Murrizit, Balluku: Synojmë të përfundojë brenda vitit 2024
• Balluku inspektim në Vlorë: Kontrolle bizneseve pranë plazheve, shkak ndotja e detit