Trump beson se nusja e tij Lara mund të vazhdojë dinastinë politike

Presidenti i sapozgjedhur i SHBA-së, Donald Trump, ka thënë se gruaja e djalit të tij Eric, Lara, mund të vazhdojë dinastinë politike të familjes.

Trump e deklaroi këtë në një intervistë për revistën Time, e cila e shpalli atë personin e vitit. Lara Trump ka dhënë dorëheqjen si bashkëkryetare e Konventës Kombëtare Republikane dhe disa republikanë i kanë bërë thirrje asaj të marrë vendin e Senatit të mbetur bosh nga largimi i Marco Rubio nga Florida.

Ajo tha për AP se do ta konsideronte seriozisht nëse do t’i ofrohej pozicioni i Rubios. Nëse konfirmohet zgjedhja e Rubios në postin e sekretarit amerikan të shtetit, atëherë guvernatori i Floridës, Ron de Santis do të emërojë dikë në vendin e tij në Senat, transmeton portali Axios.

Kur u pyet nëse ai parashikon që Lara mund të vazhdonte dinastinë Trump në politikën amerikane, Donald Trump tha se ajo ishte e shkëlqyer si kryetare e Konventës Kombëtare Republikane.

Presidenti i sapozgjedhur shtoi se, kur të përfundojë mandati i tij, do të donte të linte pas njerëz jashtëzakonisht kompetentë dhe se djemtë e tij Donald Jr dhe Eric janë pikërisht të tillë.
Trump shtoi se vajza e tij Ivanka do të ishte gjithashtu një superstar në politikë, por se ajo është aq e orientuar nga familja, sa do t’ia vështirësonte shumë karrierën politike.

Ivanka Trump njoftoi në vitin 2022 se nuk planifikon të marrë pjesë më në jetën politike pasi shërbeu si këshilltare e babait të tij gjatë mandatit të tij të parë.

LEXONI GJITHASHTU:

• Trump kritikon vendimin për ta lejuar Ukrainën të sulmojë thellë brenda Rusisë
• Donald Trump shpallet sërish Personi i Vitit nga “Time”