Trump: Do ta zbatoj 100% vendimin për tarifa nëse s’ka marrëveshje për Groenlandën

Presidenti i SHBA-së, Donald Trump, ka deklaruar se do t’i zbatojë “100%” kërcënimet e tij për vendosjen e tarifave të mëtejshme nëse nuk arrihet një marrëveshje për Groenlandën. I pyetur nëse do të përdorte forcën për të marrë kontrollin e ishullit, Trump u përgjigj shkurtimisht: “pa koment”.

Deklaratat e tij vijnë në një kohë kur janë publikuar edhe mesazhe të dërguara kryeministrit të Norvegjisë, ku Trump sugjeron se mosmarrja e Çmimit Nobel për Paqen do të thotë se ai nuk ka më “një detyrim për të menduar vetëm për paqen”.

Nga ana tjetër, kryeministri i Groenlandës ka reaguar ashpër, duke theksuar se vendi i tij “nuk do të lejojë që t’i bëhet presion”. Ai ka nënvizuar se deklaratat e fundit nga SHBA-të, përfshirë kërcënimet për tarifa, nuk e ndryshojnë qëndrimin e Groenlandës.

Reagime ka pasur edhe nga Europa. Kryeministri i Mbretërisë së Bashkuar, Keir Starmer, e ka cilësuar planin e Trump për vendosjen e tarifave ndaj tetë vendeve si “krejtësisht të gabuar”, ndërsa ka minimizuar rëndësinë e masave hakmarrëse.

Gjatë fundjavës, Trump deklaroi se duke filluar nga shkurti do të vendosë një tarifë prej 10% për mallrat nga tetë aleatë të NATO-s, nëse ata kundërshtojnë marrjen e pushtetit nga ana e tij, duke paralajmëruar se tarifat mund të rriten deri në 25% deri në muajin qershor.