Trump u bën thirrje kontrollorëve të trafikut ajror: Kthehuni në punë tani

Presidenti amerikan Donald Trump u është drejtuar këtë mëngjes kontrollorëve të trafikut ajror përmes një postimi në rrjetin e tij social Truth Social, duke u kërkuar atyre të rikthehen menjëherë në punë pas javësh pa paga.

“Duhet të ktheheni në punë, tani!”, shkroi Trump, duke reaguar ndaj raportimeve se disa punëtorë kishin marrë leje mjekësore pas një periudhe të gjatë pa pagesë.

Në të njëjtin postim, ai tha se nuk ishte “i kënaqur” me punëtorët që kishin munguar gjatë asaj që e cilësoi si “Mashtrimi i Mbylljes Demokratike”. “Do të kesh një notë negative, të paktën sipas meje, në dosjen tënde. Nëse dëshiron të largohesh nga shërbimi në të ardhmen e afërt, të lutem mos hezito ta bësh, pa asnjë pagesë apo përfitim të çfarëdo lloji!”, shtoi ai.

Aktualisht, nuk është e qartë nëse Trump ka autoritet të drejtpërdrejtë mbi çështjen e pagave të kontrollorëve të trafikut ajror. Megjithatë, ai premtoi se do të rekomandojë një bonus prej 10,000 dollarësh për ata punonjës që nuk kanë marrë pushim gjatë periudhës së mbylljes.