“Tullumbacet e azotit efekt anestezik”, zv/ministrja: Nuk del nga spitalet

Protoksidi i azotit, që po përdoret gjerësisht nga të rinjtë dhe adoleshentët përmes tullumbaceve, nuk klasifikohet tek barnat narkotike të ndaluara, çka duket se e bën të vështirë kontrollin nga ana e autoriteteve.

Ky diskutim u soll në komisionin e ligjeve si shqetësim përpara zv ministres së shëndetësisë Entela Ramosaçaj, e cila deklaroi se ky medikament përdoret në spitale si anestezik, por dha garancinë se lënda nuk rrjedh nga spitalet.

Deputetja e Partisë Demokratike Dhurata Çupi kërkoi që Ministria e Shëndetësisë të ndërmarrë masa konkrete për parandalimin e këtij fenomeni.

Sipas saj, projektligji i vënë në tryezën e kuvendit ka për qëllim vetëm ndryshimet për kanabisin mjekësor, por jo reflektimin e kësaj problematike

Veç spitaleve, kjo lëndë e rrezikshme për shëndetin e adoleshentëve përdoret edhe në industrinë e ushqimit dhe asaj të makinave, duke hapur dy pista të reja kontrolli se lënda mund të rrjedhë në mënyrë të paligjshme edhe prej këtyre dy sektorëve.

Komisioni i ligjeve miratoi këtë të martë ndryshimet në ligjin “Për barnat narkotike dhe lëndët psikotrope” për të përditësuar tabelën e medikamenteve, çka do të thotë se kanabisi mjekësor do të njihet si i tillë.

LEXONI GJITHASHTU:

• Tullumbacet me drogë, gazetarja e Euronews blen në mes të Tiranës bombolën me azot
• “Tullumbacet” në lokalet e natës, droga e fortë qarkullon lirshëm në kryeqytet