Turizmin e dominojnë shqiptarët, në qershor u shfrytëzuan 22.9% e kapaciteteve

Vetëm 22.9% e hoteleve dhe strukturave të akomodimit shqiptare janë përdorur nga turistët gjatë qershorit të këtij viti.

Sipas të dhënave të Institutit të Statistikave Shqiptare, norma e shfrytëzimit të kapaciteteve të industrisë së turizmit ka një rritje të lehtë me 4.2 pikë përqindje krahasuar me qershorin e vitit 2021.

Në total janë 174.143 vizitorë që kanë qëndruar për të pushuar në vendin tonë, kundrejt 138.766 që ishin një vit më parë.

Numri më i lartë i turistëve është shënuar në bregdet, i cili zë 62.5% të pushuesve, por rritje ka shënuar edhe turizmi në rajonin qendror, kryesisht Tirana.

Vizitorët në këto zona janë rritur me 30% kundrejt vitit të shkuar.

Peshën më të lartë të turizmit e kanë mbajtur vendasit me 41.6% të numrit të vizitorëve, të ndjekur nga shtetasit e Kosovës me 16.7%, polakët me 7.1%, Italia 5.2% dhe Gjermania dhe Anglia me 4.8 dhe 2.6%.

Shumica e turistëve kanë zgjedhur që të flenë në hotele dhe shtëpi, por 7457 persona kanë zgjedhur kampingjet dhe rulotë. Kjo kategori është rritur me 2.6 herë vetëm këtë vit.

Në total në Shqipëri janë shfrytëzuar 446 mijë net fjetje në qershor, çka bën që hoteleria mesatarisht të ketë përfituar 20 milionë euro.

LEXONI GJITHASHTU:

• Turizmi në Shëngjin, operatorët: Sezon i suksseshëm, problem infrastruktura
• Kasa: Turizmi nuk promovohet, të ftohen njerëz të famshëm në Shqipëri