Turqia dhe Mbretëria e Bashkuar nënshkruajnë memorandum për avionët luftarakë

Ministri turk i Mbrojtjes, Yasar Guler, dhe Sekretari i Mbrojtjes i Mbretërisë së Bashkuar, John Healey, nënshkruan sot një Memorandum të Plotë Mirëkuptimi që konfirmon pranimin e Turqisë si operator i avionëve luftarakë “Eurofighter Typhoon”.

Ky dokument u firmos gjatë Panairit të 17-të Ndërkombëtar të Industrisë së Mbrojtjes (IDEF) në Stamboll dhe synon të thellojë bashkëpunimin mes dy vendeve në fushën e mbrojtjes ajrore dhe industrisë së sigurisë.

Në deklaratën e Ministrisë së Mbrojtjes Kombëtare të Turqisë theksohet se memorandumet kodifikojnë marrëdhëniet midis dy vendeve dhe përfaqësojnë një hap të rëndësishëm drejt finalizimit të marrëveshjeve të mëtejshme për operimin e “Typhoon”. Të dy ministrat mirëpritën nënshkrimin si një hap pozitiv që afron Turqinë me klubin e përdoruesve të këtij avioni luftarak.

Ministria vuri në dukje rëndësinë e bashkëpunimit të gjatë midis Turqisë dhe Mbretërisë së Bashkuar, duke përfshirë koordinimin brenda NATO-s dhe përpjekjet për rritjen e lidhjeve në industrinë e mbrojtjes dhe sigurisë.

“Mirëpritja e Turqisë si operator i ‘Eurofighter Typhoon’ do të forcojë miqësinë dhe bashkëpunimin midis dy aleatëve kryesorë të NATO-s, duke shënuar një hap kyç drejt përmirësimit të aftësive ajrore të Turqisë,” theksohet në deklaratë.

Gjithashtu, Ministria turke e Mbrojtjes Kombëtare nënvizoi se ky memorandum shënon fillimin e një kapitulli të ri në partneritetin Turqi-Mbretëri e Bashkuar, duke punuar së bashku për të forcuar aftësitë e përbashkëta dhe duke mbështetur industrinë e mbrojtjes nëpërmjet blerjeve reciproke të pajisjeve kryesore ushtarake.

LEXONI GJITHASHTU:

• Kosova pranon autoblinda amerikane, pilotët e FSK-së përfundojnë trajnim në Turqi
• Trump e kërcënon Rusinë me tarifa nëse nuk ka marrëveshje brenda 50 ditësh