Tyson Fury do të rikthehet në ring, i merr leje bashkëshortes për ndeshjen me Joshua

Të apasionuarit pas boksit do të kenë mundësinë të ndjekin një super duel ditët në vijim, ai mes Anthony Joshua dhe Tyson Fury. Ky i fundit u tërhoq nga sporti pak muaj më parë, por nuk është aspak çudi që u rikthye, pasi kjo tashmë është kthyer në diçka të zakonshme. Këtë herë, për t’u kthyer sërish në ring, “gipsyking” i mori leje bashkëshortes së tij dhe siç raporton The Sun, ajo i ka dhënë dritën jeshile për t’u ndeshur.

“Dalja në pension nuk është e lehtë për t’u përballuar, çdo ditë zgjohem dhe filloj boksin në hije dhe brenda meje dua të luftoj. Nuk do të lodhem kurrë, sepse jam i lindur për ta bërë këtë gjë. Është e vështirë ta lë të shkoj, është shumë e vështirë, sepse është diçka që e shijoj. Kisha disa oferta dhe bashkëshortja ime Paris më mbështeti e për këtë jam i lumtur”, u shpreh Fury duke nënkuptuar se ajo ka qenë shtysa më e madhe që 36-vjeçari të kthehet në ring.

Ai është një ndër boksierët më të mirë në botë e këtë e konfirmojnë statistikat ku në 37 duele ka 34 fitore, 2 humbje dhe 1 barazim. Të vetmet disfata i ka ndaj kampionit absolut të botës, Oleksandr Usyk. Në anën tjetër, Joshua që është 1 vit më i ri numëron 28 fitore dhe 4 humbje.