U aksidentua me motor, ndërron jetë pas 20 ditësh djali i biznesmenit të njohur

Ka ndërruar jetë në moshën 27-vjeçare Amarildo Pajtoni, djali i sipërmarrësit Mentor Pajtoni dhe nipi i biznesmenit tjetër të suksesshëm Armando Pajtoni.

27-vjeçari ndërroi jetë 20 ditë pasi u aksidentua me motor në aksin rrugor Kavajë-Rrogozhinë.

Policia në një komunikatë zyrtare bën me dije se Amarildo pajtoni nën drejtimin e një motomjeti ka goditur një automjet që drejtohej nga një shtetas nga Kosova, Jeton Syla.

I riu ishte i angazhuar në bizneset e familjes dhe ishte një personazh i njohur në rrjete sociale, ku ndante me ndjekësit pasionin për motorat dhe jetskitë.

Ai postonte shpesh dhe video me një këlysh luani.

“Në lidhje me aksidentin rrugor të ndodhur rreth orës 10:15, të datës 26.06.2024, në autostradën “Kavajë-Rrogozhinë”, ku motomjeti me drejtues shtetasin A. P., 27 vjeç, banues në Tiranë, ka goditur nga mbrapa automjetin me drejtues shtetasin kosovar J. S., 38 vjeç, dhe si pasojë mbeti i dëmtuar 27-vjeçari, i cili u transportua në Spitalin e Traumës, ju informojmë se:

Në lidhje me këtë rast janë kryer të gjitha veprimet hetimore dhe procedurale, në drejtimin e Prokurorisë së Durrësit. Në përfundim të këtyre veprimeve, nisi procedimi në gjendje të lirë për shtetasin J. S., për veprën penale “Shkelja e rregullave të qarkullimit rrugor”.

Nga kryerja e testit të alkoolit, 38-vjeçari rezultoi 0.00 mg/l.

Dyshohet se për shkak të dëmtimeve nga ky aksident, ditën e djeshme, shtetasi A. P. ka humbur jetën në Spitalin e Traumës, Tiranë”, thuhet në njoftimin e policisë.