U gjet e vdekur në banesë pas zjarrit, dyshohet se gruaja në Pogradec është vrarë

Një ngjarje e rëndë ka ndodhur këtë të hënë në Pogradec, ku një 52-vjeçare dyshohet se është vrarë në apartamentin e saj, ku më pas banesës i është vënë zjarri për të fshirë gjurmët e krimit.

Fillimisht, policia njoftoi se 52-vjeçarja Kozeta Teço u gjet e pajetë në apartamentin e saj në Pogradec, ku brenda banesës u konstatuan zjarr dhe tym, dhe dyshohej se ajo kishte humbur jetën nga asfiksia e shkaktuar nga tymi.

Por ngjarja ka marrë një tjetër rrjedhë, pasi burime për Euronews Albania bëjnë me dije se dyshohet se 52-vjeçarja është vrarë, ndërsa zjarri është vendosur për të mbuluar provat e krimit.

Të njëjtat burime thonë se në trupin e 52-vjeçares janë konstatuar shenja dhune, një çarje në grykë dhe një plagë në krah.

Policia është rikthyer në vendin e ngjarjes dhe po punon për të mbledhur prova të tjera lidhur me dyshimet për vrasjen e 52-vjeçares Kozeta Teço, e cila jetonte e vetme në banesën e saj.

Kujtojmë se banorët e zonës, pasi vunë re flakët në apartamentin e saj, njoftuan menjëherë zjarrfikëset dhe policinë, të cilët mbërritën në vendin e ngjarjes dhe gjetën të pajetë 52-vjeçaren.

LEXONI GJITHASHTU:

• Zjarr në një banesë në Pogradec, 52-vjeçarja humb jetën nga asfiksia
• Po lëvizte me taksi me pistoletë me vete, arrestohet në Tiranë 23-vjeçari nga Lezha