U godit me thikë nga emigranti në kufirin bjellorus, humb jetën ushtari polak

Një ushtar polak, i cili ishte therur nga një emigrantë në kufirin me Bjellorusinë, ka vdekur të enjten, njoftuan autoritetet polake.

Ushtari, i identifikuar vetëm me emrin Mateusz, ishte therur pesë herë përmes gardhit metalik pesë metra të lartë derisa po e patrullonte kufirin, sipas mediave lokale.

Ushtria polake raportoi për dy sulme të tjera ndaj trupave të saj në kufi javën e kaluar. Njëri ushtar pësoi plagë nga therja me thikë të ngjitur në një shkop dhe një tjetër pësoi lëndime në fytyrë pasi u sulmua me një shishe të thyer.

Polonia e ka akuzuar Rusinë se po e orkestron fluksin e emigrantëve drejt Polonisë përmes aleatit të Kremlinit, Bjellorusisë.

Në fund të majit, kryeministri polak Donald Tusk tha se Qeveria e tij do ta kthejë zonën neutrale 200 metra të gjatë në kufi me Bjellorusinë në javën e parë të qershorit.

Në javët e fundit është rritur numri i emigrantëve që kanë tentuar ta kalojnë jashtëligjshëm kufirin, ndërsa rojet kufitare kanë raportuar për një numër incidentesh të dhunshme.

Polonia synon t’i shpenzojë 2.55 miliardë dollarë për forcimin e kufirit me Bjellorusinë.

Javë më parë, ministri polak i Mbrojtjes, Wladyslaw Kosiniak-Kamysz, tha se Polonia është e gatshme ta rrisë numrin e trupave në kufi nga 5.500 sa ka tani, por nuk tregoi se sa saktësisht.

LEXONI GJITHASHTU:

• “T’i shkatërrojmë me votë”-Salianji-Ramës: Do të godasë ata që i kapin në shkelje
• Rama për rikthimin e aksionit opozitar: Mos i falni më, shkatërrojini me votë