U godit nga pllaka metalike, plagoset punëtori i Uzinës së Ferrokromit në Elbasan

Një punonjës ka mbetur i plagosur rëndë në Uzinën e Ferrokromit në Elbasan pasi një pllakë me peshë prej qindra kilogramë i ka rënë mbi trup.

Rudin Mecja raportohet se ndodhej në turnin e parë kur i ra sipër pllaka e rëndë.

Mjekët kanë konstatuar se punonjësi, mekanik në Uzinën e Ferrokromit, ka pësuar dëmtime të shumta. Për shkak të gjendjes kritike është transportuar për në Spitalin e Traumës në Tiranë.

Ngjarja e rëndë ndodhi vetëm një muaj pas një vendimi ndaj kompanisë që administron këtë uzinë, e cila në muajin maj është gjobitur me 8 milionë lekë nga autoritetet për shkelje të rënda të standardeve të sigurisë teknike në procesin e punës. Sipas raportimeve, kompania nuk kishte garantuar mbrojtjen dhe masat e nevojshme për mbrojtjen e jetës si edhe shëndetit të punonjësve.

Pas aksidentit të sotëm, Inspektorati Shtetëror i Punës dhe Shërbimeve Shoqërore ka vendosur pezullimin e menjëhershëm të aktivitetit të uzinës në pritje të hetimeve të plota dhe verifikimeve në terren mbi shkaqet dhe përgjegjësitë që çuan në këtë ngjarje të rëndë.