U infektua nga gripi i shpendëve, regjistohet vdekja e dytë në SHBA nga virusi

Një banor i Uashingtonit ka vdekur pasi u infektua nga gripi i shpendëve i cili më parë ishte zbuluar vetëm te kafshët. Ky është rasti i dytë në SHBA në vitin 2025.

Pacienti ishte shtruar në spital në fillim të muajit dhe nga testet e kryera nga Universiteti i Uashingtonit u zbulua se ai vuante nga lloji H5N5 i virusit të gripit të shpendëve. Zbulimi u konfirmua nga Qendrat për Kontrollin dhe Parandalimin e Sëmundjeve (CDC), agjencia kryesore e shëndetit publik në SHBA.

“Rreziku për popullatën mbetet i ulët”, siguruan autoritetet.

Sipas tyre nuk ka prova të transmetimit nga një person tek tjetri të këtij virusi. Pacienti mësohet se kishte një fermë shpendësh në kopshtin e tij. Qendrat për Kontrollin dhe Parandalimin e Sëmundjeve (CDC) kanë regjistruar më shumë se 70 raste njerëzore të gripit të shpendëve në SHBA këtë vit.

Një pacient vdiq në janar në Luiziana pasi u infektua me H5N1. Organizata Botërore e Shëndetësisë, OBSH ka numëruar mbi 1,000 raste njerëzore të gripit të shpendëve që nga viti 2023 në 25 vende, pavarësisht nga lloji.

LEXONI GJITHASHTU:

• Plani i paqes në Ukrainë, Trump dhe Starmer bisedë telefonike për hapat e ardhshëm
• Dëbora e parë në Korçë, zbardhen fshatrat Dardhë e Shtyllë