U përfol si trajneri i ardhshëm i Kosovës, 46-vjeçari spanjoll nënshkruan në Rusi

Marrëveshja mes Federatës së Futbollit të Kosovës dhe trajnerit Roberto Moreno nuk është arritur, me këtë të fundit që është emëruar në kampionatin rus. 46-vjeçari kishte zhvilluar një takim me presidentin Agim Ademi në Turqi, ndërsa ishte një ndër kandidatët për stolin e dardanëve. Teksa lajmi qarkulloi me shpejtësi në media, ku kritikat ishin të shumta, duket se spanjolli e ka marrë vendimin e tij.

Ai është emëruar si trajner i skuadrës Sochi në kampionatin rus, ndërsa prezantimi i tij është bërë orët e fundit, teksa është konfirmuar nëpërmjet një postimi në rrjetet sociale. Moreno kishte dy oferta, teksa në garë ishte dhe Adana Demirspor ekip ku aktivizohet Mario Balotelli. Duket se kushtet e ofruara nga Sochi ishin më të favorshme nga skuadrat e tjera, duke bërë që të udhëtojë drejt Rusisë.

Kosova prej javësh është në kërkim të një trajneri për stolin e dardanëve, ndërsa alternativat janë të shumta. Deri më tani nuk ka asgjë zyrtare, vetëm thashetheme të qarkulluara në media, teksa sic duket edhe tekniku i radhës do të jetë i huaj.