U raportua si vetëvrasje, nis hetimi për spanjollin e gjetur pa jetë në Divjakë

Prokuroria e Lushnjës ka nisur hetimet lidhur me vdekjen e shtetasit spanjoll Francisco Javier Carraso Cervilla, disa ditë më parë në Divjakë, ngjarje e raportuar si vetëvrasje.

Përmes një njoftimi bëhet me dije se regjistrimi i këtij procedimi penal është bërë me qëllim kryerjen e një hetimi të plotë dhe të gjithanshëm për dinamikën dhe shkaqet e ngjarjes.

“Ky procedim është në fazën fillestare të tij dhe nisur nga natyra e çështjes janë kryer veprimet e plota hetimore që konsistojnë në këqyrjen e vendit të ngjarjes, sekuestrimin e provave materiale dhe këqyrjen e tyre, janë marrë vendimet e nevojshme të ekspertimit, janë pyetur persona që kanë dijeni për ngjarjen. Të gjitha të dhënat e përftuara deri në këtë fazë po analizohen dhe kryqëzohen me njëra-tjetrën, me qëllim përcaktimin e shkakut të ardhjes së pasojës”, sqaron prokuroria.

47-vjeçari u gjet i pajetë mbrëmjen e 21 prillit. Policia raportoi se ishte dëmtuar me mjet prerës gjatë kohës që ka qenë duke bërë dush dhe për pasojë kishte humbur jetën.

LEXONI GJITHASHTU:

• Gjendet i pajetë në një kanal në Vlorë 51 vjeçari nga Kukësi
• Gjendet i pajetë një person në aksin Elbasan-Peqin, dyshimet e para