U shpall në kërkim gjatë “Tempullit”, arrestohet 35-vjeçari. Çfarë iu gjet në banesë

Një 35-vjeçar i shpallur në kërkim në kuadër të megaoperacionit Tempulli është arrestuar nga policia e Tiranës këtë të premte.

Arrestimi i tij e çon në 71 numrin e shtetasve të ndaluar në kryeqytet.

Policia bën me dije se ka sekuestruar në cilësinë e provës materiale, doza me heroinë, të cilat iu gjetën 35-vjeçarit gjatë kontrollit të banesës.

Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme.

“Si rezultat, në rrugën “Gjergj Legisi”, në Laprakë, është lokalizuar, kapur dhe ndaluar shtetasi R. D., 35 vjeç, banues në Tiranë, i cili ishte shpallur në kërkim pasi Gjykata e Shkallës së Parë e Juridiksionit të Përgjithshëm Tiranë i ka caktuar masën e sigurisë “Arrest në burg”, për veprën penale “Prodhimi dhe shitja e narkotikëve”, thuhet në njoftimin e policisë.

Kujtojmë se, gjatë zhvillimit të këtij operacioni, janë sekuestruar 14 kg kanabis, 5.3 kg kokainë, 170 gram heroinë dhe 11 peshore elektronike, 4 armë zjarri pistoleta dhe 1 armë zjarri automatik, 70 celularë, 11 automjete, 2 186 000 lekë, 11 610 euro, 630 paund.

Sakaq vijon puna për lokalizimin dhe kapjen e shtetasve të tjerë të shpallur në kërkim në kuadër të këtij megaoperacioni.

LEXONI GJITHASHTU:

• “E ke tritol”-Kurthi i agjentëve për shitësit e drogës në Tiranë, u hoqën si blerës
• “Tempulli”, mes 23 të arrestuarve dhe këshilltari bashkiak në Elbasan (EMRI)
• Megaoperacioni antidrogë, Rrumbullaku: U goditën 7 grupe kriminale, 273 të arrestuar