Ukraina mban zi pas sulmeve ajrore ruse të një dite më parë

Një ditë zie po mbahet në Ukrainë pas një prej valëve më të këqija të sulmeve raketore ruse në disa muaj, me të paktën 41 persona të vrarë dhe 166 të plagosur.

Sipas mediave të huaja, spitali kryesor i fëmijëve në kryeqytetin Kiev ishte ndër ndërtesat e goditura në qytete anembanë vendit të hënën.

Dy persona vdiqën kur një raketë rrafshoi një pjesë të Spitalit të Fëmijëve Ohmatdyt, objekti më i madh i pediatrisë në Ukrainë dhe kërkimi për të mbijetuar nën rrënoja vazhdoi deri në orët e para të së martës.

Diku tjetër, guvernatori i rajonit jugor të Rusisë, Belgorod, i cili kufizohet me Ukrainën, tha se katër persona kishin vdekur në sulmet e Ukrainës në 24 orët e fundit.

Të hënën, Rusia mohoi të ketë shënjestruar spitalin e Kievit, duke thënë se ai ishte goditur nga fragmente të një rakete të mbrojtjes ajrore ukrainase, ndërsa Ukraina tha se kishte gjetur mbetje të një rakete lundrimi ruse.

Presidenti ukrainas Volodymyr Zelensky e quajti sulmin “brutal” dhe e përshkroi homologun e tij rus Vladimir Putin si një “kriminel gjakatar”.

NATO po përgatitet të mbajë një samit më vonë të martën në Uashington, ku përgjigja e bllokut ushtarak ndaj pushtimit të Ukrainës do të jetë në krye të axhendës.

Udhëheqësit botërorë aleatë të Ukrainës e kanë dënuar sulmin, përfshirë kryeministrin e ri britanik, Sir Keir Starmer.

LEXONI GJITHASHTU:

• Çfarë dihet nga sulmi në spitalin e fëmijëve në Kiev, mbi 20 të vrarë në Ukrainë
• Orban në Kinë për arritjen e paqes në Ukrainë