Ukraina nis anijet me grurë, reagon Kremlini: Lojë e rrezikshme

Autoritetet në Ukrainë kanë deklaruar se 12 anije të ngarkuara me drithëra u nisën të hënën nga portet e detit të Zi, pavarësisht tërheqjes së Rusisë nga marrëveshja që lehtësonte eksportet.

Një zyrtar ukrainas bëri të ditur se një nga anijet me 40 mijë tonelata drithëra ishte nisur drejt Etiopisë, që përballej seriozisht me rrezikun e vdekjeve në masë për shkak të urisë.

Më herët, Kievi zyrtar akuzoi Moskën se po shantazhonte botën me anë të urisë.

Rusia u tërhoq nga marrëveshja javën e kaluar, pas një sulmi me dronë ndaj flotës së saj në detin e Zi, të cilin ia atribuoi Ukrainës.

Nga ana e tij, Kievi nuk e pranoi përgjegjësinë e sulmit duke akuzuar Kremlinin se prej kohësh kishte planifikuar të tërhiqej nga marrëveshja e ndërmjetësuar nga OKB dhe se i duhej vetëm një pretekst.

Pasi Rusia nisi të sulmojë Ukrainën në muajin shkurt, marina e saj vendosi një bllokadë në portet ukrainase të detit të Zi, duke lënë stok rreth 20 milionë tonelata drithëra.

Të hënën, ministri ukrainas i Infrastrukturës njoftoi në Twitter se 12 anijet kishin lënë portet e Ukrainës në orët e para të mëngjesit.

Duke reaguar, zëdhënësi i presidentit rus paralajmëroi se do të ishte shumë e rrezikshme për Ukrainën të vazhdonte eksportin e drithërave pa pëlqimin e Rusisë.

LEXONI GJITHASHTU

• Rusia vijon sulmet në infrastrukturën ukrainase, mijëra banorë pa energji elektrike
• Gazetari: Nëse Rusia sulmon anijet me grurë, Turqia sanksione të rënda
• Rusia dhe Ukraina këmbejnë përsëri të burgosurit