Usyk rrëfen pengun e karrierës: Dua të luftoj para popullit tim, në Ukrainë

Kampioni i padiskutueshëm i peshave të rënda në boks, Usik ka rrëfyer pengun e madh të karrierës, njëkohësisht dhe ëndrrën, që të boksojë përpara popullit të tij. Ukrainasi mendon se lufta do të zgjasë ende, e si pasojë ai nuk mund të ndeshet në vendlindje.

Karriera e tij ka rezultuar një sukses i padiskutueshëm, duke fituar cdo trofe të mundshëm, e madje ngjitur në majën e piramidës botërore të boksit, por për Oleksandr Usyk asgjë nuk ka më tepër rëndësi se të boksojë përpara popullit të tij. 38-vjecari e cilëson këtë si një ëndërr, por njëkohësisht një peng që nuk ka gjasa të realizohet për shkak të gjendjes së luftës.

“Tani mendoj se nuk është e mundur. Rusia lufton me Ukrainën, ka shumë raketa. Unë flas me vajzën time 14 vjeçe. “Hej, si jeni?” “O baba, kjo natë ishte e tmerrshme”. Kështu që, të dueloj si kampion bote para fansave të mi nuk besoj se do të realizohet ndonjëherë”, deklaroi Usyk në një intervistë për Sky Sports.

Oleksandr Usyk shpesh ka reaguar në lidhje me situatën që vendi i tij po kalon si pasojë e luftës, ku me mijëra qytetarë të pafajshëm kanë humbur jetën. Sa i përket karrierës si sportist numëron vetëm fitore konkretisht 23 të tilla, nga ku 14 janë me KO. Dueli i fundit ishte ai ndaj Tyson Fury, një ripërballje ku sërish arriti ta mposhtë, duke bërë që britaniku të njoftonte tërheqjen nga boksi.

LEXONI GJITHASHTU:

• Usyk mbron titullin kampion bote në duelin me Tyson Fury
• Përballja e shekullit në boks, Usyk do të ndeshet me Fury