Vaksinimi i fruthit, Tomini: Përmirësohet situata, mbulesa vaksinale arrin në 94%

Frika nga Covid e përzier me paranojën e disa prindërve se vaksina e fruthit shkakton autizëm, bëri që niveli i vaksinimit të fëmijëve zbres në nivelin e 79% në të gjithë botën. Edhe Shqipëria pësoi rënie të shifrave të fëmijëve të vaksinuar, por tashmë  sipas drejtoreshës së ISHP Eugena Tomini, situata po përmirësohet.

 “Gjatë periudhës së Covid dhe post Covid patëm një rënie ndoshta dhe hezitimi përkundrejt strukturave shëndetësore, për shkak të Covid, transmetueshmërisë,  por sigurisht që vaksina e fruthit ka dhe një impakt tjetër sepse janë disa grupe hezituese që e vonojnë aplikimin e  vaksinës, aktualisht kemi një përqindje vaksinale me dozë të parë dhe dozë të dytë, me dozë të parë shkon 86-87% me dozë të dytë shkojmë 93-94%”,-tha Eugena Tomini, drejtore e ISHP-së.

Ekspertët thonë se fëmijët nuk janë të mbrojtur deri në imunizimin e plotë me dy doza, ndaj edhe rekomandohet vaksinimi.

“Rekomandohen të gjithë prindërit të kryejnë aplikimin në kohë të vaksinës, mbron më shumë fëmijën tënd duke e aplikuar vaksinën sesa e privon atë nga një jetë e shëndetshme, sepse klinikisht fruthi është sëmundje vdekjeprurëse dhe jep pasojat e veta, por të parandalojmë në kohë dhe mundësia është në moshën 12 muajsh dhe rivaksinimi 5 vjeç”,-tha drejtorja e ISHP-së.

Organizata Botërore e Shëndetësisë, ju ka bërë thirrje të gjitha shteteve që të marrin masa për të rritur mbulesën vaksinale deri në 95% me dy doza, domosdoshmëri kjo për të mbrojtur popullatën nga shpërthimet epidemike.

LEXONI GJITHASHTU:

• Vaksina kundër HPV/ ISHP: Në janar të 2024 do vaksinohen edhe vajzat 14-20 vjeç
• Grip e Covid në qarkullim/ 270 mijë vaksina antigrip vijnë në tetor për të riskuarit