Valë e re dhune në Ekuador: 7 të vrarë nga të shtënat në një sallë bilardoje

Të paktën shtatë persona u vranë dhe katër të tjerë u plagosën nga anëtarë të një bande kriminale në një sallë bilardo në qytetin Santo Domingo de los Cachilas, në perëndim të Ekuadorit, të premten në mbrëmje, tha policia lokale.

Ky është sulmi i dytë i tillë në të njëjtin qytet në më pak se një muaj. Të shtënat e para ndodhën më 17 gusht dhe vranë gjithashtu shtatë persona, raporton Associated Press.

Sipas kolonel Olga Benavides, sulmi ishte rezultat i një “konflikti territorial” midis bandave rivale.

Në raportin e policisë thuhet se një nga të vrarët dhe dy të plagosurit kishin precedentë penalë për trafik droge, lidhje me grupe kriminale, vrasje dhe vjedhje.

Pamjet e publikuara nga mediat lokale tregojnë burra të armatosur me rroba të zeza, jelekë dhe helmeta të forta që hyjnë në objekt dhe hapin zjarr, duke bërë që viktimat të rrëzohen menjëherë në dysheme.

Automjeti i përdorur nga sulmuesit u gjet më vonë i djegur në një pjesë tjetër të qytetit.

Ekuadori është përballur me një valë dhune për katër vjet, e cila është rezultat i zgjerimit të grupeve kriminale të lidhura me kartelet e drogës meksikane dhe kolumbiane.

Në janar 2024, presidenti i vendit, Daniel Noboa, shpalli gjendjen e konfliktit të brendshëm të armatosur dhe caktoi 22 organizata kriminale si grupe terroriste.

Pavarësisht kësaj, dhuna nuk pakësohet. Nga janari deri në korrik 2025, në Ekuador u regjistruan më shumë se 5,500 vrasje, që është dukshëm më e lartë se 3,697 vrasjet në të njëjtën periudhë në vitin 2024, tregojnë të dhënat zyrtare.

LEXONI GJITHASHTU:

• Kapen tre tonë kokainë në Ekuador, autoritetet: I përket mafias shqiptare
• Kishte ndërtuar bunker nëntokë, arrestohet bosi më i kërkuar i drogës në Ekuador