Vance: Po punojmë për një takim historik mes Trump, Putin dhe Zelensky

Ndërsa Presidenti Vladimir Putin përgatitet të takohet me Presidentin Trump të premten në Alaska, zëvendëspresidenti JD Vance tha të dielën se SHBA-të po punojnë për të organizuar një takim ku do të përfshihet edhe Presidenti i Ukrainës, Volodymyr Zelensky.

Vance konfirmoi se Shtëpia e Bardhë po punon për të përcaktuar kohën kur të tre udhëheqësit mund të ulen së bashku në një tryezë bisedimesh.

“Shtetet e Bashkuara po përpiqen të organizojnë një takim trepalësh mes presidentit amerikan Donald Trump, presidentit rus Vladimir Putin dhe presidentit ukrainas Volodymyr Zelensky, me synimin për të diskutuar mundësinë e një zgjidhjeje paqësore për luftën në Ukrainë,” është shprehur Vance për Fox News.

Ai deklaroi se një nga pengesat kryesore për këtë takim ka qenë refuzimi i mëparshëm i Putinit për të negociuar me Zelenskyn, por shtoi se tani ekziston një përpjekje serioze për të ndryshuar këtë dinamikë.

Të dielën në mëngjes, Zelensky postoi në rrjetet sociale se: “Rusia po bën gjithçka për të zgjatur armiqësitë, refuzon të ndalojë vrasjet pavarësisht afateve të shpallura dhe po përpiqet të negociojë për pozicione më të mira në terren për sulme të ardhshme. Një sjellje e tillë shkatërruese nga Rusia duhet të ndalet.”

Vance theksoi se SHBA-të nuk duan të vazhdojnë financimin e drejtpërdrejtë të luftës, por mbeten të përkushtuara ndaj paqes dhe janë të hapura për një zgjidhje diplomatike ku palët përfshihen drejtpërdrejt.

“Ne duam të sjellim një zgjidhje paqësore për këtë çështje,” tha ai.

“Amerikanët janë të lodhur nga kjo luftë dhe është koha për një rrugëdalje të arsyeshme.”

Takimi i planifikuar ndërmjet Trump dhe Putin këtë të premte në Alaska pritet të jetë një hap vendimtar, ndërkohë që mbetet e hapur mundësia që Zelensky të bashkohet në bisedime.

Ndërkohë, zyrtarë të NATO-s dhe udhëheqës evropianë janë në kontakt të ngushtë me SHBA-në për të siguruar që paqja të mos arrihet pa përfshirjen e plotë të Ukrainës dhe Evropës në proces.

LEXONI GJITHASHTU:

• Zelenski: Ukraina s’do të bëjë kompromis territorial përpara bisedimeve Trump-Putin
• Takimi me Trump: Presidenti rus Putin, konsultohet me homologun kinez Xi