Varre masive nga tërmeti në Turqi, gazetarja: E pamundur identifikimi i viktimave

Gazetarja Aida Topalli deklaroi se në Turqi janë hapur varre masive për viktimat e tërmetit të fuqishëm që goditi vendin disa ditë më parë.

Në një lidhje të drejtpërdrejtë për Euronews Albania nga Hatay, një ndër qytetet më të goditura, Topalli u shpreh se shumë nga personat që janë nxjerrë pa jetë nga rrënojat, nuk janë identifikuar.

Sipas saj, ka shumë ndërtesa të rrënuara dhe numri i viktimave pritet të rritet.

“Shumica e qytetarëve të cilët janë dëmtuar dhe kanë mbijetuar janë zhvendosur në afërsi të Antalya-s, apo në qytete të tjera të paprekura nga tërmeti. Këtu kanë mbetur ekipet e kërkim shpëtimit, njerëzit që sjellin ndihma dhe ata që presin që nga rrënojat të dalin trupat e familjarëve të tyre.

Duke qenë se janë shumë godina të rrënuara, numri i njerëzve që janë ende nën rrënoja vijon të jetë ende i lartë. Ka familjarë që nuk kanë ende kontakt me njerëzit e tyre. Bëhet fjalë për pallate të rrënuara. Mendoj që numri i viktimave do të vazhdojë të rritet. Janë hapur varre masive, por shumë nga personat e nxjerrë nga rrënojat, nuk dihet se kush janë. Nuk ka era varresh dhe kjo do ta vështirësojë punën për identifikimin e tyre”, theksoi ajo.