Vazhdojnë protestat në Izrael, qytetarët kundër Netanyahut: Po na çon në diktaturë

Dhjetëra mijëra izraelitë mbushën rrugët e Tel Avivit për fundjavën e 17-të rresht, për të protestuar kundër reformës së propozuar të qeverisë për sistemin gjyqësor.

Demonstratat, që zgjasin prej më shumë se 3 muajsh, kanë tërhequr disa qindra mijëra njerëz, të cilët akuzojnë kryeministrin Benjamin Netanyahu se po e çon Izraelin drejt diktaturës.

“Ne po protestojmë çdo javë për të kërkuar që qeveria ta mbajë vendin demokratik. Pa demokraci nuk mund të kemi një sistem të shëndetshëm, nuk kemi drejtësi, e gjithë ëndrra sioniste do të dështojë. Unë do të jem këtu derisa qeveria të bjerë”, thotë një burrë.

Mbështetësit e planit të qeverisë Netanyahu për të ndryshuar gjyqësorin mbushën gjithashtu rrugët, me disa dhjetëra mijëra simpatizantë të së djathtës ekstreme që u mblodhën në Jerusalem të enjten e kaluar, për të protestuar në favor të reformës.

Vetë Netanyahu u detyrua muajin e kaluar të shtynte planin e tij për shkak të intensifikimit të protestave.

LEXONI GJITHASHTU:

• BE: Të shqetësuar për përshkallëzimin e dhunës në Izrael, Palestin dhe Liban
• Izraeli thotë se ka kryer sulme hakmarrëse në Siri