Vendimi i Kushtetueses për Tiranën, Manjani: S’bëhet dot asnjë veprim për zgjedhje

Juristi, Ylli Manjani i ftuar në “Now me Erla Mëhillin” në Euronews Albania ka komentuar vendimin e marrë nga Gjykata Kushtetuese këtë të enjte për pezullimin e zgjedhjeve të pjesshme në Bashkinë e Tiranës. Manjani theksoi se Gjykata Kushtetuese ka bërë detyrën pasi shkelja e Kushtetutës ishte e madhe.

Ai u shpreh se në rast se Gjykata Kushtetuese merr vendimin për shkarkimin e Veliajt atëherë lind një vend vakant për bashkinë e Tiranës. Sipas tij në atë moment presidenti mund të caktojë një datë të re zgjedhjesh. Juristi theksoi se ky veprim ndodh kur bëhet zyrtarisht shkarkimi i kryebashkiakut.

“Sot ka ndodhur kjo gjë, Gjykata Kushtetuese nuk po them se ka bërë ndonjë trimëri të madhe, ka bërë detyrën. Bënte muu si lopë shkelja e kushtetutës, në këtë lopllëk ka vendosur një farë normaliteti, i përkohshëm por e ka vendosur.

Që do të thotë me pezullimin e efektit të dekretit të Tiranës praktikisht është legjitimuar pezullimi i vendimit të qeverisë për shkarkimin e Veliajt. Po është ende kryetar derisa ta shkarkojë Gjykata Kushtetuese, nëse do e shkarkojë. Gjëja është kthyer në një normalitet kushtetues. Qoftë edhe përkohësisht. Ajo çfarë do të vendosë Gjykata Kushtetues është temë tjetër, nuk dua të futëm në botën e spekulimeve,” u shpreh ai.

Sa i përket pezullimit të zgjedhjeve në Tiranë, Manjani theksoi askush nuk mund të kryejë asnjë veprim administrativ. Sipas tij kjo është pasoja e këtij pezullimi.

“Nuk ekziston asnjë veprim administrativ për përgatitjen e zgjedhjeve në bashkinë  e Tiranës. Ky është efekti ligjor i këtij pezullimi. Ndoshta nuk e kane menduar aq thellë ata qe e kanë vendosur por pasoja është kjo”, theksoi ai.