Vetëvrasja e 41-vjeçares, Nikolla: Do ashpërsojmë legjislacionin për rrjetet sociale

Kryeparlamentarja Lindita Nikolla ka reaguar pas ngjarjes së rëndë të ndodhur në Durrës, ku një 41-vjeçare i dha fund jetës pas bullizimit që i bëhej përmes një llogarie me emrin e saj në rrjetin social “Tik Tok”.

Përmes një njoftimi në rrjetet sociale, Nikolla ka paralajmëruar ashpërsim të legjislacionit për mediat online.

Nikolla duke u shprehur ngushëllimet familjarëve, thekson se Agjencitë ligjzbatuese duhet të reagojnë më shpejt, me më shumë forcë dhe efiçience për parandalimin e rasteve të tilla.

Reagimi i plotë:

Një nënë e katër fëmijëve, u vetësakrifikua për shkak të denigrimit në mediat sociale. Fëmijët dhe bashkëshorti humbën njeriun e tyre më të dashur, që i kishte thirrur për t’u gëzuar bashkarisht për festat.

U bëj thirrje organeve të drejtësisë t’u japin shkaktarëve dënimin maksimal, të merituar.

Kjo ngjarje tragjike duhet të shërbejë si një apel i fuqishëm për shoqërinë dhe institucionet.

Kuvendi do të rishqyrtojë menjëherë, me përparësi ashpërsimin e legjislacionit për mediat online dhe Kodin Penal, sidomos dispozitat që lidhen me krimin kibernetik, sulmet, fyerjet dhe agresivitetin në rrjetet sociale.

Agjencitë ligjzbatuese duhet të reagojnë më shpejt, me më shumë forcë dhe efiçience për parandalimin e rasteve të tilla, të cilat ndodhin para syve të të gjithë shoqërisë dhe shkaktojnë ngjarje tragjike e trauma familjare. Ngushëllime fëmijëve, bashkëshortit dhe familjarëve të të ndjerës! U prehtë në paqe!

LEXONI GJITHASHTU:

• U vetëvra pas bullizimit në Tik Tok, flet burri i 41-vjeçares: Dyshojmë te kushërira
• Vetëvrasja e gruas pas bullizmit në Tik Tok, reagon policia: Kemi referuar rastin