Policia ka reaguar pas ngjarjes së rëndë të ndodhur në Durrës, ku 41-vjeçarja Bedrie Loka u vetëvra pas bullizimit që i bëhej përmes një llogarie me emrin e saj në “Tik Tok”.
Përmes një njoftimi, Policia thotë se kanë referuar rastin në Prokurori dhe çështja është nën hetim, për vënien para përgjegjësisë ligjore të shtetasve që kanë keqpërdorur të dhënat e viktimës.
Sqarim i Drejtorisë Vendore të Policisë Durrës
Në lidhje me një lajm të publikuar në media, për një shtetase që ka humbur jetën pasi dyshohet se ka konsumuar fotoksinë, për shkak të bullizmit, ju sqarojmë se:
Më datë 02.01.2024, në orën 16:30, jemi njoftuar nga shërbimet e spitalit se shtetasja B. L., 41 vjeçe, që dyshohej se kishte konsumuar lëndë helmuese fotoksinë, edhe pse kishte marrë ndihmë mjekësore, nuk kishte mundur të jetonte.
Drejtoria Vendore e Policisë Durrës ka kryer të gjitha veprimet me grup hetimor, në drejtimin e Prokurorisë, dhe materialet janë referuar në Prokurori.
Sqarojmë se në dhjetor të vitit 2022, shtetasja B. L. ka bërë kallëzim se në rrjetet sociale ishte hapur një adresë false me emrin e saj.
Për kallzimin e bërë ne dhjetor 2022, Policia ka kryer të gjitha veprimet dhe i ka referuar materialet në Prokurori dhe çështja është në hetim në Prokurori. Pas këtij kallëzimi nuk ka patur asnjë kallëzim apo shqetësim nga shtetasja B. L, për këtë rast.
Në drejtimin e Prokurorisë së Durrësit vijojnë hetimet për zbardhjen e plotë të rrethanave të këtij rasti.
Ndërkohë që vijojnë hetimet intensive për identifikimin dhe vënien përpara përgjegjësisë ligjore të shtetasve që kanë keqpërdorur të dhënat e shtetases B. L.
LEXONI GJITHASHTU:
- U vetëvra pas bullizimit në Tik Tok, flet burri i 41-vjeçares: Dyshojmë te kushërira
- EMRI| U bullizua në Tik Tok, nëna e 4 fëmijëve i jep fund jetës në Durrës