Vettingu i politikanëve, këshilltari ligjor në PD: Të krijohet një sektor i posaçëm pranë SPAK

Këshilltari ligjor i grupit të PD-së, Marash Logu u shpreh në emisionin “Mirëmëngjes” në Euronews Albania se demokratët propozojnë që Vettingu i politikanëve të përfshijë  presidentin, kryetarin e parlamentit, ministrat, deputetët dhe kryetarët e bashkive.

Sa i përket organeve që mund të kryejnë këtë proces, z. Logu tha se duhet të krijohen mekanizma që të kenë edhe besimin e publikut dhe politikanëve. Ai nënvizoi se pranë SPAK duhet të krijohet një sektori i posaçëm që të ndjekë Vettingun e politikanëve.

“Ne nuk kemi menduar që të krijojmë institucione të reja për të zgjeruar numrin e organeve në vend, pasi mendojmë se janë të mjaftueshme dhe të bollshme. Por, kemi menduar që pranë SPAK të krijohet një sektori i posaçëm që do të ndjekë Vettingun e politikanëve, i cili në përbërjen e tij do të ketë 6 prokurorë”, u shpreh ai, teksa shtoi se këta prokurorë do të zgjidhen me short për një mandat 3-vjeçar.

Z. Logu shtoi se do të ngrihet edhe një Komision i Posaçëm Parlamentar që nuk do të ketë fuqi vendimmarrëse, por do ketë vetëm funksione monitoruese dhe rekomanduese.

LEXONI GJITHASHTU:

• Ndryshimet kushtetuese, Balla: Jemi 100% të hapur për të diskutuar mbi propozimet e PD-së
• Fabian Topollai: 3 Propozimet e PD-së nuk janë serioze