Mbahet protesta e Rithemelimit, Berisha mesazh online qytetarëve

Është mbajtur në bulevardin “Dëshmorët e Kombit”, protesta kombëtare e thirrur nga Rithemelimi.

Eksponentët e lartë të Rithemelimit, përfshirë kreun e grupit parlamentar të PD Gazmend Bardhi marshuan së bashku me mbështetësit nga selia blu në drejtim të Kryeministrisë.

Kjo është protesta e parë e Rithemelimit e cila nuk udhëhiqet nga ish-kryeministri Sali Berisha, i cili që prej fundit të dhjetorit 2023 ndodhet nën masën e sigurisë “Arrest në shtëpi”.

Në krye të turmës ishin Flamur Noka, Luçiano Boçi, Gazment Bardhi, Belind Këlliçi dhe Tomorr Alizoti.

Me pankarta si: “Ta bëjmë Shqipërinë si gjithë Europa”, protestuesit marshuan drejt godinës së qeverisë.

Kreu i Partisë së Lirisë, Ilir Meta dhe deputetja e kësaj force politike Monika Kryemadhi nuk ishin të pranishëm në protestën e thirrur nga opozita, për shkak të angazhimeve jashtë shtetit.

Ndërkohë që nga Partia e Lirisë në shesh ishin nënkryetari Petrit Vasili dhe Sekretari i Përgjithshëm, Tedi Blushi.

Edhe deputetja e Partisë Demokratike, Jorida Tabaku, e shoqëruar nga ish-deputeti Alfred Rushaj, iu bashkua qytetarëve në shesh.

Ish-kryeministri Sali Berisha përshëndeti qytetarët me një fjalim nga banesa e tij, ku akuzoi qeverinë për procesin gjyqësor ndaj tij dhe shpalljen “non-grata”.

Protesta e opozitës u mbajt në një datë simbolike, pasi 20 shkurti shënon dhe rënien e bustit të ish-dikatatorit Enver Hoxha 33 vjet më parë.

LEXONI GJITHASHTU: 

• Meta dhe Kryemadhi nuk do jenë në protestën e opozitës, zbulohet arsyeja
• Protesta e parë pa Berishën, kush po i udhëheq protestuesit drejt Kryeministrisë