Vidhet gjatë natës “Range Roveri” në Durrës, rasti i dytë brenda pak ditësh

Një tjetër automjet tip Range Rover, prodhim i vitit 2015, është vjedhur në Durrës. Ngjarja ka ndodhur në orët e para të mëngjesit të sotëm, në lagjen nr.12, në rrugën “Neki Libohova”.

Në pamjet e kamerave të sigurisë duken momentet kur hajduti merr automjetin e parkuar në anë të rrugës dhe largohet me të.

Pronari i mjetit, shtetasi S. C., ka bërë menjëherë denoncimin në polici, ndërkohë që forcat e rendit kanë nisur punën për të identifikuar dhe kapur hajdutin e mjetit dhe njëkohësisht për të gjetur makinën.

Pak ditë më parë, një tjetër mjet Range Rover u vodh në Durrës, në lagjen nr.4 dhe vetëm disa orë më pas ai u gjet në zonën e Fushë-Krujës, në Thumanë. Dyshohet se këto automjete vidhen për t’u shitur e përdorur më pas në ngjarje kriminale, por edhe për t’u çmontuar për pjesë.

Vitin e kaluar në Durrës u denoncuan në polici 27 automjete të vjedhura, me një mesatare rreth 2 automjete çdo muaj, ndërsa pas hekurave kanë përfunduar 8 autorë.

LEXONI GJITHASHTU:

• Durrësi, temperatura ekstreme në 2040/ BB: Shkak mungesa e hapësirave të gjelbra
• Zhdukja e fëmijës 3-vjeç në Durrës, reagon policia