Vidhnin lekë dhe sende në lokalet në zonën e plazhit në Durrës, arrestohen 2 persona

Policia e Durrësit këtë të enjte ka arrestuar në flagrancë dy persona pasi vidhnin lekë dhe sende në zonën e plazhit në Durrës.

Sipas raportimeve, kanë rënë në pranga E. H., 29 vjeç, dhe M. I., 25 vjeç, të dy banues në lagjen nr. 13, Durrës.

Këta shtetas u kapën në flagrancë, në kohën që po vidhnin në lokalin e shtetasit B. M., ku kishin marrë sende të ndryshme, një shumë parash dhe një biçikletë. Ndërkohë, në rrugën “Bajram Curri”, kanë marrë disa pije alkoolike dhe një biçikletë.

Gjithashtu, këta shtetas dyshohet se kanë vjedhur në një lokal bar-piceri, në pronësi të shtetasit A. G., në lagjen 13, Durrës, një shumë prej 3 milionë lekësh dhe një aparat telefonik.

Shërbimet e Policisë sekuestruan, në cilësinë e provës materiale, një pjesë të shumës së lekëve të vjedhura, një aparat celular dhe një biçikletë.

Materialet do t’i kalojnë Prokurorisë së Shkallës së Parë të Juridiksionit të Përgjithshëm, Durrës, për veprën penale “Vjedhja në bashkëpunim”, parashikuar nga neni 134/2 i Kodit Penal.

LEXONI GJITHASHTU:

• VIDEO/ Humbi nënën gjatë sulmeve, 11-vjeçari ukrainas përlot Parlamentin Evropian
• Lirohet nga burgu ish-ministri Lefter Koka