Vijojnë bombardimet në Ukrainë, Kremlini: Të hapur për bisedime

Trupat ruse kanë bombarduar sërish Kharkivin, qytetin më të madh të Ukrainës, si dhe Zaporizhian, kryeqendra e një prej 4 rajoneve të aneksuara nga Rusia.

Të paktën 9 persona janë lënduar, ndërkohë që është dëmtuar rëndë edhe infrastruktura, përfshirë një kompleks industrial.

Në sulmin në Zaporizhia, Moska përdori raketa të tipit “S-300” për të shkatërruar, siç tha ajo, një aeroport të vogël. Por ndërsa bombardimet në Ukrainë vazhdonin, nga Kremlini u dhanë sinjale shprese.

“Presidenti Putin ka qenë i hapur për bisedime që nga fillimi. Ai e ka thënë vazhdimisht këtë. Në këtë aspekt asgjë nuk ka ndryshuar, me përjashtim të regjimit të Kievit, që ka deklaruar se nuk dëshiron të vazhdojë bisedimet me Rusinë”, tha Dmitry Peskov, zëdhënës i presidentit rus.

Por fjalët e zëdhënësit të Kremlinit bien ndesh me realitetin. Ukraina druhet se Moska do të rihapë frontin verior dhe do të sulmojë nga kufiri bjellorus rajonet e Volinit dhe Rivnes me ndihmën e ushtrisë bjelloruse.

Shërbimet sekrete britanike besojnë se lajmet për një mobilizim të përbashkët ruso-bjellorus janë një përpjekje për të shpërqëndruar ushtrinë ukrainase, që po përgatitet të rimarrë rajonin e Khersonit, në jug të vendit.

Rusia ka zhvendosur prej ditësh disa mijëra banorë në zona të sigurta, si pjesë e një operacioni të kontestuar, të cilin Moska e quan “evakuim”, ndërsa Kievi “dëbim”. Moska akuzoi ushtrinë ukrainase se vrau 4 civilë pasi bombardoi një urë të përdorur për të ashtuquajturat evakuime, akuzë kjo e mohuar nga Kievi.

LEXONI GJITHASHTU

• Rusia mohon importimin e dronëve iranianë, DASH kërcënon me sanksione

• Rusët zbarkojnë në Bjellorusi, Ukraina frikë për sulme

• Lufta| Përgatitje të reja në kufi e ajër, trupat ruse drejt Bjellorusisë