Vijojnë zjarret në zonën mes Delvinës dhe Gjirokastrës, rrezikohen stane dhe bagëti

Zjarret që përhapen nga zonat e Delvinës dhe Sarandës drejt Gjirokastrës kanë vazhduar të djegin sipërfaqe të mëdha me pyje dhe kullota gjatë natës në Qafën e Skërficës.

Dhjetra hektarë janë përfshirë nga flakët, duke shkaktuar dëme të konsiderueshme në mjedis dhe duke rrezikuar stanet dhe tufat e bagëtive në lartësitë e Malit të Gjerë.

Këto vatra zjarri mbahen nën monitorim të vazhdueshëm, ndërsa në orët e para të ditës së hënë zjarrfikës, punonjës të bashkisë, ushtarë dhe vullnetarë kanë nisur ndërhyrjet për krijimin e zonave të sigurisë dhe parandalimin e përhapjes së flakëve drejt zonave të banuara.

Terreni i vështirë dhe malor e bën të pamundur përdorimin e infrastrukturës zjarrfikëse, ndërsa ndërhyrja nga ajri mbetet zgjidhja e vetme e mundshme.

Zjarret që po përfshijnë pyjet dhe kullotat e zonës së Malit të Gjerë, si dhe ato që kanë shpërthyer në Sarandë dhe Delvinë, kanë shkaktuar dëme të konsiderueshme, duke djegur dhjetëra hektarë sipërfaqe.

LEXONI GJITHASHTU:

• Përkeqësohet situata gjatë natës nga zjarri në Sasaj, Balluku monitoron zonën
• Zjarr në një banesë në Pogradec, 52-vjeçarja humb jetën nga asfiksia