Viktima nga cikloni në Majot, territori francez rrafshohet nga stuhia

Persona të shumtë kanë mbetur të vrarë pasi cikloni “Çido” ra në territorin francez në oqeanin Indian, Majot.

Sipas autoriteteve, bëhet fjalë për stuhinë më të keqe që godet ishujt në thuajse një shekull.

“Çido” solli erëra që frynin me 220 kilometra në orë, duke shkulur çatitë e shtëpive dhe rrëzuar pemët në mbarë arqipelagun.

Duke folur në një takim emergjent në Paris, kryeministri francez Fransua Bajru deklaroi se rreziqet po akumuloheshin dhe furnizimi me ujë e ushqime ishin prioritet.

Ministria franceze e Brendshme bëri të ditur se 1.600 oficerë policie janë angazhuar për të ndihmuar popullsinë lokale. 110 specialistë dhe zjarrfikës janë nisur nga Franca.

Majot është territori më i varfër i Francës dhe më parë ka pasur probleme me thatësirën dhe mungesën e investimeve.

Gjithashtu, autoritetet atje janë përpjekur të frenojnë dhunën e bandave që pllakosi arqipelagun vitin e kaluar.

LEXONI GJITHASHTU:

• Të paktën 46 të vdekur nga stuhia tropikale në Filipine
• I ftohti ekstrem mbërthen SHBA, mbyllen shkollat e anulohen fluturimet