Virusi Papiloma: Vaksinimi nuk do të jetë më vetëm për vajzat, përfshihen edhe djemtë

Vaksinimi kundër virusit të Papilomës Humane (HPV) nuk do të jetë më vetëm për vajzat. Autoritetet shëndetësore kanë vendosur që në kalendarin kombëtar të vaksinimit të përfshihen edhe djemtë 13-vjeçarë, si pjesë e masave parandaluese kundër disa llojeve të kancerit.

“Vaksina përmban katër tipe të virusit të Papilomës Humane, konkretisht nëntipet 6 dhe 11 që mbrojnë nga lythat gjenitale, si dhe nëntipet 16 dhe 18 që mbrojnë nga kanceri i qafës së mitrës tek vajzat, kanceret e organeve gjenitale si tek vajzat ashtu edhe tek djemtë, si dhe nga kanceri i fytit dhe i faringut,” – shprehet Arben Xhabija, mjek.

Vendimi për ta bërë të detyrueshëm vaksinimin edhe për djemtë synon parandalimin e sëmundjeve të rënda të lidhura me HPV-në, veçanërisht kancerin e qafës së mitrës tek vajzat, si dhe kanceret gjenitale dhe ato të fytit tek djemtë.

“Normalisht, çdo vit vaksinohen rreth 700 vajza të moshës 13-vjeçare. Prej dy vitesh kemi nisur edhe një fushatë vaksinimi për vajzat e moshës 14 deri në 20 vjeç, ku vaksinohen rreth 150 vajza çdo vit,” – thekson Xhabija.

Sa i përket vaksinimit të vajzave 13-vjeçare, kryevaksinatori bën të ditur se në qytetin e Shkodrës janë realizuar rreth 700 vaksina, ndërsa prej dy vitesh po vijon paralelisht edhe fushata e vaksinimit për vajzat deri në moshën 20-vjeçare.

“Në disa qendra shëndetësore ka nisur tashmë edhe vaksinimi për djemtë. Janë paraqitur dhe janë vaksinuar edhe ata që kanë mbushur moshën 13 vjeç gjatë këtij muaji,” – shton mjeku.

Për tremujorin e parë të këtij viti, autoritetet shëndetësore kanë siguruar 350 doza të vaksinës për djemtë, ndërsa procesi i vaksinimit po realizohet në qendrat shëndetësore të qytetit të Shkodrës.