Ky vit për fermerët e Peqinit ka qenë i mbarë sa i përket prodhimeve bujqësore.

Krahasuar me një vit më parë, kulturat bujqësore kanë dhënë rendiment, por shqetësimi i fermerëve mbetet mungesa e një tregu.

Ibrahim Sinani, nga fshati Gryksh i Peqinit, ka filluar të vjelë rrushin. Ai ka rreth 300 rrënjë rrushi dhe 500 rrënjë ullinj. Ndonëse prodhimi ka cilësi, çmimi me të cilin e kërkojnë tregtarët mbetet I ulët.

“Problemi është se nuk e tregtojmë dot. Unë do të bëj 30 kuintalë rrush, por ku do ta çoj. Përveçse raki, unë nuk kam ku e çoj”, tha Sinani.

Ibrahimi nuk ka krah pune për t’i shërbyer tokës. Të rinjtë e fshatit, bashkë me fëmijët e tij, kanë ikur në emigrim, duke e lënë vendin pa punëtor.

“Unë jam moshe e tretë sa fuqi kam unë 67 vjeç, fmitë kanë ik në emigracion nuk kanë levërdi të kthehen këtu te jetojnë me mu, për arsye se nuk jetojnë dot”, tha më tej Sinani.

Edhe për specialistët e bujqësisë ky vit konsiderohet i mbarë. Mirëpo kanë disa sugjerime për fermerët në këtë periudhë, për t’i ruajtur prodhimet bujqësore nga sëmundjet sezonale.

“Momenti kryesor që duhet treguar kujdes është mbrojtja nga dëmtuesi. Jemi ne fazën kur syri i palloit dhe miza e ullirit shfaqen paralelisht njëra me tjetrën dhe krijojnë dëme të konsiderueshme qoftë në gjethe qoftë në frut”, tha eksperti i bujqësisë, Beki Dervishi.

Përdorja e plehrave organik dhe krasitja në kohën e duhur shihen si dy nga avantazhet që kanë ndihmuar fermerët e Peqinit për të pasur prodhimtari të lartë këtë vit.

LEXONI GJITHASHTU:

• Fermerë e Maliqit takim me ministren e Bujqësisë: Viti më i vështirë në 28 vite
• Çmimet e ulëta të produkteve| Fermerët e Maliqit në protestë, bllokojnë rrugën