Vit me humbje për energjinë, 20% e sasisë shkoi dëm në rrjet

Shqipëria nuk arriti të prodhonte vitin e kaluar energjinë elektrike të nevojshme për konsumin vendas. Thatësira, çmimet e larta dhe humbjet në rrjet ishin disa prej arsyeve që sollën humbje në sektor.

Në vitin 2022, Shqipëria prodhoi 7 milionë megavat energji elektrike, ndërkohë që iu deshën për konsum 7.9 mln megavat. Pra, diferencën e bleu në tregje të huaja duke dalë me bilanc negativ në 10 muaj të vitit, ndërkohë që vetëm në prill dhe dhjetor ecuria e prodhimit dhe shitjeve ishin pozitive.

Në të dhënat e Entit Rregullator të Energjisë, bilanci energjetik doli negativ për shkak të thatësirës së tejzgjatur, që e mbajti nivelin e Fierzës në kuota të ulëta për disa muaj dhe çmimeve të larta të importit që ishin deri në 10 herë më të larta se çmimet mesatare ndër vite.

Gjithashtu, humbjet në rrjetin e shpërndarjes u regjistruan në 1.5 mln megavat orë, ose 20% e totalit, për shkak të rrjetit të amortizuar apo vjedhjeve. Pjesa më e madhe e tyre, humbjet teknike në masën 67% e tyre u shkaktuan nga rrjeti, ndërkohë që 33% erdhën nga lidhjet e paligjshme. Nëse kjo sasi do të shitej me çmim mesatar 300 euro, KESH do arkëtonte 450 mijë euro në buxhetin e tij.

Në krahasim me të njëjtën periudhë të një viti më parë ka një reduktim të lehtë të humbjeve, por niveli mbetet i lartë, krahasuar me vende të tjera ku humbjet janë në nivelin 5 deri në 10%.

LEXONI GJITHASHTU:

• ‘Spiunia’ ruse s’do ekstradohet, avokati: Në Rusi do përndiqej, qëndrime anti-Putin
• Apeli lë në burg Lefter Allën, avokati: Është rëndë, rekurs në Gjykatën e Lartë
• Dikur të ndaluara me ligj-Japonia miraton planet për ndërtimin e një kazinoje