Vjosa del nga shtrati, prefektja e Vlorës mbledh Shtabin e Emergjencave

Vendi vijon të jetë i përfshirë nga reshjet e shiut ndërsa Prefektja e Vlorës ka mbledhur Shtabin e Emergjencave në ambientet e Njësisë Administrative Novoselë për të analizuar situatën e krijuar pas daljes nga shtrati të lumit Vjosë.

Prefektja, Evis Allushi, ka kërkuar informacion të detajuar nga të gjitha strukturat përgjegjëse, duke theksuar gatishmërinë maksimale për menaxhimin e situatës. Ajo nënvizoi se prioritet mbeten banorët dhe siguria e tyre.

Kryetarja e Bashkisë Vlorë, Brunilda Mersini, bëri një pasqyrë të situatës në qytet pas reshjeve, duke kërkuar zgjidhje përfundimtare për banesat pranë shtratit të lumit. Ajo theksoi domosdoshmërinë e largimit të tyre dhe sistemimin e familjeve të prekura, përfshirë edhe strehimin në banesa sociale.

Kreu i Njësisë Administrative Novoselë, Kanan Shakaj, kërkoi zgjidhje për problematikën e gërryerjes së tokave në Mifol si dhe për argjinaturën në Bishan, të cilat paraqesin rrezik në raste reshjesh të shumta.

Ndërkohë, shefi i Rendit, Shpëtim Hasanaj, iu referua edhe problematikave në qarkullim, duke informuar mbi masat e marra për garantimin e sigurisë dhe menaxhimin e trafikut.

Nga institucionet u theksua gatishmëria për çdo situatë emergjente dhe ndërhyrja e menjëhershme në ndihmë të banorëve, në rast se situata përkeqësohet nga përmbytjet.