Vlerësimi i Eurostat, rritet inflacioni bazë në BE, bie lehtë ai total

Inflacioni bazë në zonën Euro u rrit në muajin shkurt, sipas një vlerësimi të publikuar të enjten nga Agjencia evropiane e statistikave.

Sipas Eurostat, inflacioni bazë, që përjashton çmimet e energjisë dhe ushqimit për shkak të paqëndrueshmërisë së tyre, u rrit në 5.6 për qind muajin e kaluar nga 5.3 që ishte në janar.

Kuota në fjalë është më shumë se dyfishi i asaj të regjistruar në shkurtin e vitit 2022.

Ndërkohë, inflacioni total pritet të zbresë në 8.5 për qind nga 8.6 që ishte në janar. Nëse shifra konfirmohet më vonë gjatë muajit, ajo do të përbëjë muajin e katërt rresht të rënies.

Ngadalësimi ka gjasa të jetë pasojë e çmimeve të energjisë që po lehtësohen më tej, me një kuotë vjetore që ka rënë në 13.7% krahasuar me 18.9 që ishte në janar.

Kjo i atribuohet nga ana tjetër temperaturave më të buta se zakonisht të verifikuara në vjeshtë dhe në fillim të dimrit, ruajtjes së rezervave të gazit dhe planeve për kursimin e energjisë në bllokun e 27 vendeve anëtare, që ka regjistruar një rënie të çmimeve të gazit në nivele të paregjistruara që kur Rusia pushtoi Ukrainën një vit më parë.

Megjithatë, çmimet për ushqimet, alkoolin, duhanin dhe mallrat e tjera që nuk kanë lidhje me industrinë energjetike dyshohet se janë rritur muaj pas muaji.

LEXONI GJITHASHTU:

• Ushqimet janë të shtrenjta, inflacioni u ul 7,2% në janar
• Inflacioni në Itali më i larti që nga viti 1985