Vllaznia kualifikohet në raundin e dytë të UEFA Women’s Europa Cup

Ekipi i vajzave të Vllaznisë vijon me sukses rrugëtimin europian, duke siguruar kualifikimin për në raundin e dytë të “UEFA Women’s Europa Cup”.

Skuadra shkodrane mposhti me rezultatin 2-0 ekipin ukrainas Kolos Kovalivka, në një ndeshje të zhvilluar në stadiumin “Loro Boriçi”, duke konfirmuar edhe një herë forcën e saj në arenën ndërkombëtare.

Golat për Vllazninë u shënuan nga Megi Doçi në minutën e 63-të dhe Teresa Deda në të 87-ën, duke vulosur fitoren e dytë radhazi në këtë raund dhe kalimin e merituar në fazën tjetër të kompeticionit.

Fillimisht, ndeshja e kthimit ishte planifikuar të luhej në Ukrainë, por për shkak të situatës në vend, të dyja ekipet ranë dakord që ajo të zhvillohej sërish në “Loro Boriçi”.

Shorti për raundin e dytë do të hidhet të premten, ku Vllaznia do të njohë kundërshtarin e radhës në këtë kompeticion të ri europian.

Nga ana tjetër, Partizani i vajzave është eliminuar pas humbjes 3-0 ndaj ekipit serb Spartak Subotica, duke mbyllur kështu pjesëmarrjen në këtë edicion të UEFA Women’s Europa Cup.

Ky kompeticion është iniciativa më e re e UEFA-s për futbollin e femrave në nivel klubesh, i nisur këtë sezon me synimin për të rritur mundësitë, cilësinë dhe konkurrencën për ekipet në të gjithë kontinentin.