Vllaznia me sytë nga Laçi, shkodranët kërkojnë të ruajnë kreun, Tirana shkon në Korçë

Vllaznia kërkon të ruajë ritmin dhe ta bëjë të paprekshëm kreun e renditjes.

Në ndeshjen e javës së nëntë të kategorisë superiore, përballë do ketë një ekip mjaft të vështirë si Laçi, por tekniku i shkodranëve ka besim se skuadra e tij do ja dalë.

“Vëmendja është e gjitha në ndeshjen përballë Laçit pasi kemi një kundërshtar shumë të fortë dhe më shumë sesa për tre pikët është e rëndësishme për vazhdimësinë e skuadrës,” – u shpreh Thomas Brdaric, trajner i Vllaznisë.

Nga ana tjetër Tirana kërkon që të ruajë ritmin.

Pas dy fitoreve të para në stolin e bardhëebluve për këtë sezon, trajneri Nevil Dede kërkon nga skuadra të mos e ulë gazin. Përballë kanë Skënderbeun, një kundërshtar që në këtë sezon po tregon që nuk është më ai i dikurshmi.

 “Është garë dhe duam të fitojmë. Po mendojmë vetëm për ndeshjen me Skënderbeun. Pa kaluar ajo ndeshje nuk mendojmë për të radhës. Normalisht është një periudhë me shumë ndeshje. Rezultatet i japin besim ekipit. Me një klimë pozitive lojtarët japin më të mirën. Do mundohemi të jemi pozitivë. Ana psikologjike është e mirë, por duhet të mundohemi të shënojmë sa më shpejt edhe më shumë. Kemi elementë të rinj që duan qetësi dhe minuta,” – tregoi Dede.

Në ndeshjet e tjera të javës së nëntë Partizani luan përballë Bylisit, Kukësi përballet me Kastriotin ndërsa Teuta udhëton në transfertën e Apollonisë.