Von der Leyen në Shkup: Përpjekjet për integrimin evropian po japin frytet e tyre

Një nënshkrim historik ngre urën mes Shkupit dhe Brukselit. Qeveria në Maqedoninë e Veriut dhe Bashkimi Evropian kanë firmosur një marrëveshje bashkëpunimi për mbikëqyrjen kufitare në kuadër të misionit FRONTEX.

Presidentja e Komisionit Evropian, që po zhvillon një tur 4-ditor në Ballkan, theksoi se përpjekjet e Shkupit për t’u afruar me familjen evropiane po japin frytet e tyre.

Sinkron Ursula von der Leyen, presidente e Komisionit Evropian:

“Procesi i negociatave po i afrohet kulmit. Po bëhet një punë shumë e mirë dhe më në fund në gjuhën tuaj. Ju kisha premtuar se marrëveshjen e FRONTEX do ta kishim përkthyer në gjuhën maqedonase, pa shënime, pa asteriskë, por në kushte të barabarta me 24 gjuhët e BE-së dhe sot mbajtëm premtimin”, tha Von der Leyen.

Gjatë turit të saj, Von der Leyen shpreson të përforcojë bashkëpunimin me vendet e Ballkanit Perëndimor për të përmirësuar sigurinë e kufijve të jashtëm të BE-së.

FRONTEX kryen prej kohësh operacione të përbashkëta me shtete si Shqipëria, Mali i Zi dhe Serbia në kuadër të marrëveshjeve të statusit, pasi vendet në fjalë ishin kthyer në akse të rëndësishme të lëvizjes së emigrantëve.

LEXONI GJITHASHTU:

• Von der Leyen tur takimesh në Ballkanin Perëndimor, të enjten viziton Tiranën
• Presidentja amerikane në krye të BE-së: Paradoksi i Ursula von der Leyen