Nga plot 70 vende të votës, pritet të mbërrijnë votat e diasporës për zgjedhjet e përgjithshme të 11 majit.

Këtë tregon aplikacioni i KQZ-së deri më tani, sa i takon vendeve nga ku kanë ardhur aplikimet për t’u regjistruar si votues në procesin e 11 majit.

Lista kryesohet nga Italia, Greqia dhe Gjermania, tre vende që së bashku përbëjnë 67.6% të aplikantëve. E thënë ndryshe, 10,873 qytetarë shqiptarë janë regjistruar deri më tani për të votuar vetëm nga Italia, Greqia dhe Gjermania. Më pas lista vijon me aplikantë nga SHBA, Britania e Madhe, Franca, Kanadaja, Suedia, Belgjika apo Zvicra.

Por ajo që bie në sy është se nuk kanë munguar gjatë këtyre 4 ditëve të para edhe regjistrimet nga vende shumë të largëta të Paqësorit, Azisë, Afrikës apo Amerikës Latine.

Në total, deri në mesditën e sotme, 4 ditë pasi ka nisur procesi i regjistrimit, kanë aplikuar rreth 16 mijë shqiptarë që jetojnë jashtë. Nga shpërndarja e këtyre aplikimeve, numrin më të lartë pas qarkut të Tiranës e kanë Fieri, Korça, Durrësi dhe Berati.

Ndërkohë, sa i takon grupmoshës që po tregon interes për të marrë pjesë në procesin e 11 majit, kryesojnë emigrantët e moshës nga 26 deri në 45 vjeç, ndërsa interesin më të ulët e kanë të rinjtë nën 24 vjeç.