“Vrapo mami vdiq”- Detaje nga ekzekutimi i 35-vjeçares, u përlesh me burrin në rrugë

“Vrapo, mami vdiq!” Ishte kjo thirrja e vajzës së Klodiana Vefës e cila është gjetur e vdekur në rrugë nga fëmijët e saj mbrëmjen e së enjtes.

35-vjeçarja u vra nga 3 plumba pas një debati me bashkëshortin e saj Alfredin.

Sipas dëshmive, çifti shqiptar i cili prej kohësh jetonte në Itali kishte mosmarrëveshje dhe burri ishte larguar nga shtëpia, por nuk ishin ndarë ligjërisht. Klodiana jetonte vetëm me fëmijët, një vajzë e një djalë, 17 e 14 vjeç.

Tragjedia ndodhi në një trotuar afër banesës dhe ishin fëmijët ata që pasi dëgjuan të shtënat dolën për të parë të ëmën pa jetë.

Në skenën e krimit janë gjetur vetëm gëzhojat e plumbave pasi autori i krimit ka marrë armën dhe është larguar me një golf të bardhë. Policia italiane po punon për kapjen e tij, ka rrethuar zonën dhe ka ngritur pika kontrolli.

Ndërkaq, nga informacionet paraprake dyshohet se shkak për ngjarjen mund të jetë bërë xhelozia e Alfredit. Ka pasur dhe raste të tjera të cilat nuk janë denoncuar asnjëherë nga Klodiana.

“Fatkeqësisht, së fundmi ndodhi një fatkeqësi në Castelfiorentino, zona Puppino. Një vajzë u vra, me sa duket pas një debati. Është vërtet herët për të zbuluar informacione për atë që ka ndodhur dhe për të diskutuar hipotezat që ende po shqyrtohen nga policia. Është një kohë për heshtje dhe për t’u mbledhur rreth një familjeje të prekur nga një ngjarje e tmerrshme,” – shkroi kryebashkiaku i Castelfiorentino, Alessio Falorni, i cili mbërriti menjëherë në vendngjarje.

LEXONI GJITHASHTU:

• “Jam beton e xham”, Postimet e fundit të shqiptares që u vra nga burri në Itali
• Shqiptari vret gruan në mes të rrugës në Itali, dëshmia e fëmijëve të çiftit