Vrasja e 25-vjeçarit, Basha: Përgjegjës s’është vetëm efektivi, Rama dhe Lleshaj të dorëhiqen

Kryetari i Partisë Demokratike, Lulzim Basha ka folur nga Vlora për vrasjen e 25-vjeçarit Klodian Rasha, ku ka kërkuar dorëheqjen e kryeministrit Edi Rama dhe të ministrit të Brendshëm, Sandër Lleshaj duke thënë se janë përgjegjës për ngjarjen e rëndë. Sipas Bashës fakti që ngjarja ka ndodhur në “Ditën e Rinisë” e atë akoma edhe më të ndjeshme ndaj edhe ka kërkuar nga drejtuesit e shtetit që të mbajnë përgjegjësi për atë që ka ndodhur.

“Dje ishte dita e rinisë, edhe në kushte të vështirë është një ditë të cilën ne duhet ta nderojmë edhe ta kujtojmë me një gëzim në shpirt se në fund të fundit se na kujton që ishte rinia ishte ajo që edhe në ditët më të errëta të kombit tonë, solli ndryshimin solli shpresën, solli dritën por edhe e djeshmja u godit rëndë nga një ngjarje e tmerrshme, nga vrasja e Klodian Rashës, 25 vjeçar.

Një brutalitet dhe përgjegjësit nuk janë thjesht ata që shkelën këmbëzën e armës mbi një të ri të pafajshëm, 20 metra nga dera e shtëpisë, por ata që kanë injektuar brutalitetin dhe ashpërsinë në çdo hallkë të qeverisjes. Kryeqeveritari, vartësi i tij që po të kishte pasur një fije dinjitet do të kishte dhënë dorëheqjen, apo po të kishte pasur një fije dhembshuri kryeministri, duhet ta kishte shkarkuar atë edhe drejtorin e përgjithshëm të policisë por nuk ka mundësi ta bëjë këtë, sepse frymëzuesi i këtij brutaliteti, kësaj arrogance, kësaj shpërfilljeje për dinjitetin, për jetën njerëzore, për jetën e të rinjve është vetë ai. E keqja ka shkuar në palcë ndaj duhet shkulur me rrënjë”, – tha Basha