Vrasja e Klevis Lleshit, GJKKO lë në burg të ekstraduarin nga Italia, Sajmir Kolaverin

Gjykata e Posaçme kundër Korrupsionit dhe Krimit të Organizuar ka lënë në fuqi masën e sigurisë “arrest në burg” për Sajmir Kolaverin.

Kolaveri u ekstradua një ditë më parë nga Italia, pasi ishte shpallur në kërkim në kuadër të hetimeve për vrasjen dhe zhdukjen e kufomës së Klevis Lleshit, ngjarje e ndodhur në vitin 2020 në Burrel.

Ai dyshohet për veprat penale “vrasje për gjakmarrje”, “fshehja ose asgjësimi i kufomës”, “grup i strukturuar kriminal”, si dhe “kryerja e veprave penale nga grupi i strukturuar kriminal dhe organizata kriminale”.

Sipas hetimeve, Kolaveri është familjar i Aurel Hoxhës, i shpallur gjithashtu në kërkim si i dyshuar për urdhërimin e vrasjes së Klevis Lleshit dhe si drejtues i grupit kriminal të njohur me emrin “Monopol”.

Hetimet për këtë ngjarje vijojnë, ndërsa autoritetet janë ende në kërkim të personave të tjerë të përfshirë në këtë dosje.

Sajmir Kolaveri