Vrasja e Martin Bardhit, pamjet e makinës së djegur nga e cila autorët kryen vrasjen

Euronews Albania ka siguruar pamjet e makinës  së autorëve të cilët vranë paraditen e kësaj të marte Martin Bardhin, 59 vjeç ndërsa plagosën dhe tre persona të tjerë.

Siç shihet në pamje, makina tip fuoristradë, është braktisur nga autorët   në fshatin Gëziq, Mirditë, të cilët i kanë vënë dhe flakën.

Martin Bardhi u qëllua në afërsi të komisariatit të qytetit të Rrëshenit me breshëri kallashnikovi. Zona në të cilën u krye atentati është një ndër më të populluarat në zonën, çka mund të kishte përfunduar dhe në tragjedi më të madhe.

Forca të shumta policie kanë rrethuar zonën dhe në ndihmë të Policisë lokale, janë nisur Forcat Speciale “RENEA” dhe FNSH, si dhe në Rrugën e Kombit, në drejtim të Kukësit, të Laçit, Lezhës dhe Dibrës, janë ngritur pika kontrolli.

Gjithashtu, drejt vendit të ngjarjes janë nisur Zv/drejtori i Përgjithshëm i Policisë së Shtetit dhe drejtorët e departamenteve të Policisë Kriminale, si dhe të Rendit dhe Sigurisë Publike.

Për zbardhjen e kësaj ngjarjeje është ngritur një grup i posaçëm hetimor, me specialistë nga Departamenti i Policisë Kriminale në DPPSH dhe nga Policia vendore, dhe në drejtimin e prokurorit, vijon puna intensive për identifikimin dhe kapjen e autorëve.

Bardhi rezulton një person me precedent të mëparshëm penal. Më herët ai është akuzuar për atentatin ndaj nipit të Kastriot Reçit, Saimir Reçi.

Në mars të këtij viti Martin Bardhi së bashku me djalin e tij kanë gjuajtur me armë në drejtim të makinës së Saimir Reçit.

Në mars ai u arrestua në lidhje me këtë ngjarje por u lirua më pas në gusht.

Kujtojmë se Kastriot Reçit, pronar i një televizioni lokal në Lezhë, u vra me snajper në muajin janar të vitit 2021 në Rrëshen.

Hasmëria mes këtyre dy fisve ka shkaktuar viktima për pothuajse dy dekada.

LEXONI GJKITHASHTU: 

• “Armatim për 200 persona”- Zveçla: Plani serb shkonte në Ibër, do shpallnin autonomi
• Atentati që mund të kishte shkaktuar tragjedi, edhe 3 të plagosur në Rrëshen