Vrasja e rreshterit Lika, IPK rekomandon pezullimin e dy zyrtarëve të policisë

Hetuesit e Inspektoratit Policor të Kosovës (IPK), bazuar në kompetencat ligjore sipas detyrës zyrtare ka filluar të ndërmarrë veprime hetimore paraprake  lidhur me veprimet policore për  zbatimin e urdhëresës për arrestimin e personit R. B (i dyshuar lidhur me rastin e  vrasjes së rreshterit policor Muhamet Lika).

Siç njofton IPK, nga veprimet paraprake hetimore të ndërmarra dhe komunikimet zyrtare të pranuara, ekziston dyshimi i arsyeshëm se deri në këtë fazë të hetimit, dy zyrtarë policorë kanë dështuar në kryerjen e detyrave zyrtare dhe kanë treguar neglizhencë serioze në zbatimin e urdhëresës për arrestimin e personit të dyshuar R. B.

“Nga informacioni i dokumentuar dhe i siguruar nga IPK-ja  ekziston dyshimi se një toger policor në pozitën e  shefit të sektorit të operativës, ka pasur dijeni për urdhëresën për arrest, por dyshohet se nuk ka ndërmarrë veprime konkrete operative për lokalizimin dhe kapjen e personit të kërkuar”, thuhet në njoftim.

Gjithashtu sipas IPK, bazuar në veprimet hetimore dyshohet se një rreshter policor i angazhuar në cilësinë e mbikëqyrësit në njësinë ndërlidhëse për gjykata, ka dështuar të raportojë me kohë dhe saktësi për urdhëresën për arrest si dhe dyshohet se nuk ka ndërmarrë hapat e nevojshëm për ekzekutimin e saj.

LEXONI GJITHASHTU:

• Vrasja e rreshterit në Kosovë, dalin sot para Gjykatës 6 të dyshuarit
• Zëvendëskryeministrja e Ukrainës: Të gatshëm të negociojmë, jo të dorëzohemi