Vrasje me armë zjarri në Shkodër, humb jetën 51-vjeçari

Petrit Vuksani 51-vjeç, është vrarë mesditën e sotme me armë zjarri në Shkodër.

Gazetari i Euronews Albania Teodor Gjerga bën me dije se ngjarja e rëndë është regjistruar në lagjen “Tom Kola”, dhe autori i dyshuar i ngjarjes është kushëriri i tij Lekë Vuksani.

Mësohet se 51-vjeçari është qëlluar më armë zjarri tip automatik, dhe shkak i vrasjes është bërë mosmarrëveshja e qirasë.

Petrit Vuksani jetonte prej vitesh jashtë shtetit dhe banesën ia kishte dhënë me qira Lekë Vuksanit, të afërmit të tij.

51-vjeçari, i cili sapo ishte kthyer nga Anglia, i ka shkuar në banesë për t’i kërkuar lekët e qirasë, por dyshohet se ata kanë debatuar dhe më pas Lekë Vuksani ka qëlluar në drejtim të kushëririt të tij ku e ka lënë të vdekur në vend.

“Rreth orës 12:15, në lagjen “Tom Kola”, në rrethana ende të paqarta, në banesë, është vrarë me armë zjarri shtetasi Petrit Vuksani, 51 vjeç”- njofton policia.

Shërbimet e Policisë dhe grupi hetimor kanë shkuar menjëherë në vendngjarje.

Janë ngritur pika kontrolli dhe po ushtrohet kontroll në zonë për kapjen e autorit të dyshuar. Grupi hetimor, në drejtimin e Prokurorisë, po vijon punën për sqarimin e rrethanave të ngjarjes, si dhe për sigurimin e çdo prove, me qëllim identifikimin dhe kapjen e autorit.

LEXONI GJITHASHTU: 

• SHBA/ Nxënësit rrahin brutalisht nëndrejtoreshën
• Nga burgu në QSUT në gjendje kome, e ëma e 28-vjeçarit: E dhunuan! Ç’më tha mjeku